अंबाजोगाई (प्रतिनिधी) :- अंबाजोगाई तालुक्यातील आंबा साखर कारखाना परिसरात शनिवारी (दि. 07) सकाळी ऊस वाहतुकीची रिकामी ट्रॉली पलटी झाल्याची घटना घडली आहे. या घटनेने काही काळ परिसरात खळबळ उडाली होती.
मिळालेल्या माहितीनुसार, MH-44 Z-7950 क्रमांकाची ही ट्रॉली ऊस टाकून रिकामी परतत होती. ही ट्रॉली कारखान्याकडे किंवा शेताकडे परतत असावी. दरम्यान आंबा कारखाना परिसरातील रस्त्यावर ट्रॉलीचा मागील टायर अचानक मोठ्या आवाजात फुटला. ट्रॉली पलटी झाल्यानंतर चालकाने ट्रॅक्टरचे हेड काढून तो घेऊन गेल्याचे दिसते, त्यामुळे घटनास्थळी फक्त ट्रॉली पडलेली आढळून आली. ट्रॉली ऊस टाकून रिकामी परतत होती, त्यामुळे आजूबाजूला ऊस पडलेला नाही.
सुदैवाने या घटनेत ट्रॅक्टर चालकाला कोणतीही दुखापत झाली नाही आणि कोणतीही जीवितहानी झाली नाही. ट्रॉलीचे मात्र मोठ्या प्रमाणात नुकसान झाले आहे. स्थानिक नागरिकांनी तात्काळ धाव घेऊन मदत केली.ऊस हंगाम सुरू असल्याने अशा ट्रॉलींची वर्दळ वाढली आहे. त्यामुळे वाहनांची नियमित तपासणी करावी, अशी मागणी शेतकऱ्यांमधून होत आहे.
